[1] EPISTOLA I.

Illustrissimo ac Potentissimo principi,

D. CAROLO,

D.G. Catholico Hispaniarum, &c. Regi, fratri et affini nostro charissimo,

CHRISTIERNUS,

Eadem gratia, Daciae, Norwegiae, Sclavorum, Gotorumque Rex, electus in Regem Sueciae, Dux Slesvicensis, Holsatiae, Stormariae, & Ditmersiae, Comes in Oldenborch, & Delmenhorst, salutem cum perpetuo gloria, regnorumque incremento.

ILLUSTRISSIME & potentissime princeps, affinis & frater charissime. Manifestum & recenti memoria teneri non ambiguus nos saepius missis Oratoribus nunciis & literis nostris promissam cum Inclytissima principe Domina ELISABETH, vestrae Majestatis sorore, conjuge nostra amantissima, dotem expostulasse, & vestram Excellentiam ammonuisse & incitasse, quatenus datas nobis desuper a Caesarea Majestate & vestra Celsitudine obligatorias literas observari & adimpleri curaret, quibus tamen hactenus (in non modicum nominis & Majestatis nostrae contemptum damnumque inaestimabile) nulla ex parte est satisfactum: quanquam confidimus V. Celsitudinem arbitrari nos integram dotis solutionem jam dudum recepisse: meruisset hoc fides nostra, qui tam patienter constitutos solutionis terminos priores praetervolare sustinuimus, quique cum vestra sublimitate fraterno foedere constanti, perpetuaque amicitia (modo ne nimium aequa & debito fraudamur) vivere & optabamus semper optamusque; proinde fraterno affectu summopere rogamus & commonefacimus quatenus V. Majestas adhuc conetur & efficiat, ut patentes obligatoriae literae nobis datae observari & adimpleri mereantur, hoc est, ut promissam nobis literis & debitam dotem hic in regno nostro Daciae omnino ante principium mensis proximi nobis absque ulteriori dilatione integram exolvi curet. Quod si adhuc exspectatione inani deludimur, cogemur certe ob multiplicem nominis & honoris nostri inexistimationem contemptumque, obque passa jam subeundaque ejus occasione damna irrecuperabilia, alio rem consilio aggredi, conarique, quanquam , DEUM testamur, inviti adversus regna, dominia, & subditos vestros, quomodocunque, quaque arte id per nos, nostrosque expedite magis fieri potent , quo promissam nobis & debitam, quaeque dudum exolvenda fuisset, dotem assequamur, damnaque per ejus solutionis dilationem passa, subeundaque recuperemus. Rogamus praeterea, quatenus praesentem nostrum nuntium continuo intra octo aut decem dies a praesentatis nostris literis, ad nos cum response & literis remittere velit, quibus confirmari, & nostris commodius providere poterimus rebus. Ex arce nostra regia Hafniensi vigesima prima mensis januarij. Anno nostrae salutis millesimo quingentesimo undevigesimo, nostro regio sub signeto.

CHRISTIERNUS.